ديوان أول بروفه – ديوان الفتافيت

الهيئة العامة لقصور الثقافة – سلسلة أصوات أدبية – طبعة أولى 1996
الهيئة المصرية العامة للكتاب – مكتبة السرة – طبعة ثانية 2002

نماذج من الديوان

1
طار العصفور من ع التوته
شاورت بعيونها البنوته
عصفورى يابو دم خفيف
كانت بنتوتك تستناك فى الشموسه
بتحنى إيديها بعرق الشمس وتتهجاك
بتغنى لغاك
مرجعتش ليه
ولفت على الأحزان ولا
بنوتك بتنقى الغله
وبتغزل توبها من الضله
وتلم القش
طاير على فين
بتزرع وجعك ع الشطين
فين رفرفتك وغناك يا ملاك
أنا منتظراك
تحت الشجرايه .. فى آخر الكون
تجت الشباك
عند القله
سقعها الهوا وانا بستناك
مرجعتش ليه
رجع العصفور غرقان فى الحزن
فى طبق بنور شايلاه غربان
والدنيا تشجر فى الأحزان
والبنوته لسه تشاور
وتنادى لعصفورها الطاير
مرجعتش ليه
أنا منتظراك
تحت الشجرايه .. فى آخر الكون
تجت الشباك
عند القله
سقعها الهوا وانا بستناك
مرجعتش ليه

2
وينادوك ساعة الممات بالاسم
وانت راخى الجسم
تتمد إيدك للسما تترد
سؤالات عيالك يتامى
لم تصادف رد
يا بويا كام عزيت
أقبل عزاك إزاى
شهق النهار فزيت
ضحك العويل للناى
صوتك مروَّح غريب
مش زى عادته
طيب إذا خبط علينا المسا
اللى إمبارح واعدته
أقوله إيه

3
ياناس
صرخت قمر ع التل
وجزمة العسكرى
النار بتلسع وردة الذكرى
الشحاتين إخوات
حافى بمرغ جسمى ف عياطك
الكازينوهات ترش رمادها ف عنيا
عكاز قديم على حيطة ام كامل
ليه ربنا مبقاش يملس ع الجروح
الطير قدم
وصوتى بيهش الشجر يمة رماد الشمس
الحدايات على راس سعيد
آيات بتمشى كأنها عيلى المشلول
رقعات على الفستان
امشى
وحوشى مرى عن الشجر
فى شئ جميل زى ماتقول
فراشه حنينه
تستر بزازك
يا ناس
عرق الأجير يعرف يطول حقه
إزاى يا حنيه بتسودى على يمين القلب
يهرب قمر براوى للذكريات
ويعاكس الدنيا
ليه النبى مش زى ما شفته أول امبارح
سيل من السواد يغسل جروحى
سلامتك
آه
يا دنيا شمعك بكى
نشفنى وأنا جايلك
عقلة صباع يا جرح واكبر م العياط
دابت عنيا ع العتبات يا ناس
صرخة قمر ع التل
وجزمة العسكرى
تضرب سلام
للموت